أمير طعيمة يعلق على اتهامات زوجته لأكرم حسني بأنه السبب في طلاقها

تحدث أمير طعيمة عن تفاصيل انفصاله عن زوجته وعلق على اتهامات زوجته لأكرم حسني بأنه السبب في الانفصال.

وكتب أمير طعيمة عبر حسابه على موقع التواصل الاجتماعي فيسبوك قائلا: "انا منفصل رسميا من شهرين و كنت منتظر الاعلان الرسمي لحين الانتهاء من بعض الاجراءات القانونية اللي كنت اتمنى انها تتم بشكل ودي حفاظا على مصلحة اولادي و رغبة مني ان الامور تتم بشكل يليق بعشرة سنين طويلة و للاسف لمًا ده ما حصلش الطلاق وقع.. فيما يخص اقحام اسم اخويا و صديقي الفنان اكرم حسني".

وتابع أمير طعيمة قائلا: "اولا مش اكرم اول و لا اخر حد هييجي اسمه بالباطل و ده للاسف كان متوقع.. بس بما ان الهجوم منها دلوقتي على اكرم فعايز اقول التالي: ١- اكرم ملوش اي صلة بالطلاق و بالعكس لما عرف من مدة اني هاخد الخطوة دي نصحني ما اعملش كده لمصلحة اولادي.
٢- كصديق و كفنان هو من انضف الناس اللي اتعاملت معاهم و اشهد ربنا اني عمري ما شفت منه غير كل خير و احترام".

وأضاف: "اكرم مش طرف مباشر او غير مباشر في الطلاق، طلاقي لاسباب اكيد مش مكانها الفيس بوك و لا تخص احد غير الطرفين، مفيش حد في الدينا بيطلق الا لاسباب تخصه.
٤- اكرم ما عملش هاك لحسابها و الكلام ده ربنا عالم انه غير صحيح
انا راجل موجود في الوسط الفني بقالي ٢٦ سنة  و اعتقد ان عمر ما حد سمع ليا حس و لا دخلت في مشاكل مع قريب او غريب و مكنتش اتمنى اكتب البوست ده بس بما ان الكلام طال ناس ملهمش ذنب وجب عليا تحمل المسئولية و الرد و ما زلت بتمنى ما اضطرش  ارد في يوم اخر على هجوم اخر على اي شخص لمجرد انه صديق و بيتعامل معي فنيا".

واختتم قائلا: "و ما زلت بتمنى من زوجتي السابقة ترك مساحة من الود عشان بنا اولاد و ربنا بيقول :
(وإذا طلقتم النساء فبلغن أجلهن فأمسكوهن بمعروف أو سرحوهن بمعروف) و ده اللي بحاول فيه من البداية و هحاول فيه للنهاية.. ربنا يهدي الجميع".

وكانت زوجة أمير طعيمة قد اتهمت أكرم حسني بأنه السبب في انفصالها عن زوجها قائلة: "سبب رئيسي في خراب بيتي التفكير ده وصاحب الفكرة دي والقعدات اللذيذة اللي أنا رفضتها وهرفضها وبرفضها".

وأضافت :"أنا بيتي قائم من 16 سنة محدش لا زعزعه ولا قرب منه ودي نتيجة إنك تدخل ناس بيتك معاهم ناس بتسمم أفكارهم".